يا قديم الغوص في بحــر الهـــوى
وش لقيت بغبّة البحـــر الغـزيـــــر
علّم الّلي جسّ شطّـه واهــــــتوى
مابعد جرّب طويلــــــه والــقصـيــر
قالــــوا إنّه من جميع أمـر حـوى
فيه سر وفيه شر وفيه خــيــــــــــر
واسمع إنّه من ركب موجـه دوى
من فعل موجه غريقه يستجيـــــــر
واسمع إنّه من لمس شطّه غوى
مايفرق بين بحــــــره والغديــــــــر
واسمع إنّه من على تركه نـــوى
يجذبه سحره ويرجـع لـــه كسيـــر
لو تجرّح فيــــه قلبـه واكتــــــوى
مايتوب ولا يريــــــح ويسـتخيــــر
وش جمع حلــوه على مـره سـوا
هي حلاة الحب في الكأس المرير
رغّبوني لين قلـبي لـــــــه هــوى
وانذروني لين صدّقــــــت النّـــذير
خوّفوني منه والقـــلب التــــــوى
راغبٍ ومعيف والخايـــف يحيــــر
هـو صحيح إن الهوى مالــه دوا
خبّر اللي جــــاك عاني يستشيـــر
كلمات : خالد الفيصل
موضوع: يا قديم الغوص .............. 
23/3/2008, 12:41 pm