هذه قصه حقيقه عسى ان تكون عبره للمدمنين والمروجين
وجدت معاه هاذي القصيده قبل اعدامه لاينفع الندم .
سمعت قصة واحد بالسجوني=يقول أنا للذبح بالسيف هايب
يقول أفضل بالرصاص اقتلوني=والعين من دونه تحول النصايب
لعل بعض الناس مايعرفوني=ودي لو التنفيذ والنور غايب
أنتم عرفتم قصتي وارحموني=أخشى على بويه تطول المعايب
لو يعرف أني مروج للفيوني=وإنّي لشره لأهل الإسلام جايب
مدمن حشيش ومثقل بالديوني=يدعي علي ودعاه لا شك صايب
ولا تخبرون اللي بطبعه حنوني=الوالده تكثر عليها المصايب
أخاف لا دريت يصيبه جنوني=واتصير معتاله على راس شايب
من ضاع عقله ما يفيد العيوني=والعقل من رب الخلايق وهايب
واللي جرحني وزاد فيّ الطعوني=قلبه عليه من أول العام ذايب
جماعتي من لبنتي قاطعوني=كيف الفتى ينساه حتى القرايب
كله سبايب شلة دهوروني=وصار الثمن راسي عليه النصايب
حسبي عليهم شلة ضيعوني=الموت حان وشد يمي ركايب
ومشيت في درب السراب مغبوني=والعقل في درب المهاميل سايب
الله يرميهم مثل ما رموني=موت المهونة شلتي به سبايب
وما طعت يوم الطيبين انصحوني=ولا ينصح الإنسان غير الحبايب
يالله وأمرك بين كاف ونوني=خلقتني مابين صلب وترايب
عوض علي دنياي واحسن ظنوني=واغفر لمن قلبه عن الشين تايب
ياللي حضرتم مقتلي سامحوني=هذي نهاية قصتي به سبايب