غريم الليل مراقب عام
عدد الرسائل : 369 العمر : 38 الأوسمه : تاريخ التسجيل : 02/03/2008
| موضوع: مفهي ومجلس أبوه ( حدث في مثل هذا اليوم ) 19/3/2008, 10:37 pm | |
| السلام عليكم ورحمة الله وبركاته اليوم الخميس صح؟<< وش رايك إنت المهم بقول لكم سالفه بمناسبة هذا اليوم وهي حدث في مثل هذا اليوم لأخوكم مفهي قبل يمكن خمس سنين تقريباً يوم كنت ب ثالث متوسط
في يوم(ن) من الأيام وحينما كنت اتبطح على كنب المجلس حق أبوي حسيت بشوي كسل ورقدت!! نمت نومه غريبه , نومه كانت كوكتيل من الشخير والهواجيس والصياح وكان اللي مزود الأكشن فيها سعابيلي !! (تخبرون مفهي وماعرف ارقد وانا مقفل فمي) ! لدرجة إن جسمي فقد 2 ليتر مويه !! << اقول لايكون حاط لك سنام بجسمك وتخزن فيه مويه يالبعير هع هع !! الا على طاري البعارين معقوله البعير يخزن المويه بسنامه؟ طيب يعني البدو مايدرون عن هالشغله ؟!! يعني انا اقول لو محلهم حطيت في سنام كل بعير بزبوز صغير !! نرجع لمجلس الوالد الله يحفظه مجلس ابوي 6 (في)10= 60 وبمناسبة الضرب والطرح والقسمه واحد من الربع دايم يجيب جدول الضرب معه إذا حضر له مناسبه وشاف العالم مالقت لها سالفه قال يافلان (طبعاً ينادي واحد من الأعيان في المجلس) وش فيك ماتسولف؟ , ويرد عليه الرجال أبد دور لنا انت سالفه نقطع فيها وقتنا عاد يفز خوينا ذا مثل اللي مبشر له بولد ويقول ابشروا بسعدكم , ويحط يده في مخباه ويطلع جدول الضرب ويقول 9 ضرب 7 يساوي كم؟ ويطالعون فيه اللي في المجلس ومشرهين عليه ويرد عليهم بكل ثقه ويقول انتم الحين من زين سوالفكم اللي مامنها فايده اللي يقول اليوم رحت للدوام ولقيت المدير قافله معه بالله وش دخلنا فيه؟! ياخي هو مديرك والا مديرنا !! والا الثاني يقول والله كنت داخل في ذيك الحاره وماسك لي خط شوي الا انا قاشع بردميه؟ بالله وش تبوني أقول له؟ لو بتكلم معه ماني قايل الا الله لايوفق من نجحك في إختبار القياده وأعطاك الرخصه هههههههههه فأبرك لكم تحفظون جدول الضرب عشان مايلعب عليكم أحد اذا جيتوا تشترون صابون تايد !! يعني سؤالي هذا بتستفيدون منه أفرضوا مثلاً أن واحد منكم اشترى تسع حبات من عصير نادك حجم عائلي وقيمة العصير 7 ريال ولعب عليه هندي البقاله وقال هات 80 ريال كيف بيدري انه مو لاعب عليه وهو مو حافظ جدول الضرب ؟!! هههههههههههههه
خطير راعي جدول الضرب هذا وبصراحه هو ثقيل طينه بس منه فايده لأنه بعد سالفته مع جدول الضرب صار أذا حضر أي مناسبه كل واحد من الجالسين يحاول يجيب له سالفه منها فايده عشان مايذيه هالآدمي <<<< سالفته هذي اللي داخل بها عرض من نوع صاروخ أرض جو نرجع لمجلس الوالد قلنا مساحته 60 متر مربع << ياخي أقلقتنا انت ومجلس أبوك والله لو إنه مجلس الوليد بن طلال ابو 50 شاشة بلازما !! المهم وانا في غياهب النوم تقريباً الساعه 9 صباحاً في مثل هذا اليوم , إلا وابوي داخل هو وإثنين من ربعه في المجلس (يعني عددهم ثلاثة اشخاص)<< ترى ركزت في العدد مو عشان جدول الضرب !! لكن لأن كل واحد منهم بيصير له موقف في القصه هذي , إلا وانا منسدح قدامهم وسعابيلي متعديه باب المجلس وفيه واحد من اخواني الصغار يوم شافها وصلت للصاله جاب له عصا صغيره وقام يحط لسعابيلي خط عشان يغير اتجاهها إلى مغاسل قسم الرجال , طبعاً البلاط حق بيتنا سيراميك وفيه نقشات حلوه , اخوي طرى عليه انه ينافس الفلبيني اللي مسوي النقشات هذي, راح اخوي يطلع مواهبه وجلس يرسم بسعابيلي قلب داخل فيه سهم ورسم له بعد شي ملخبط وراه شي ملخبط برضه بس كتب يافطه جمبه لتوضيح شخابيطه وكتب في اليافطه , الرسمه هذي رسمة ( القطو توم يطرده التسلب المتين أبو لغابيب) << مايعرف اسم التسلب هههههههههه المهم يوم دخل ابوي ولقاني نايم وماعلي إلا سروال ابيض طويل وفنيلة ماركة (ابو رحله ) تشنج وعصّب , وهو للأمانه حاول يكظم غيضه لكن (مافيني حيله) شكلي مزري وانا نايم في المجلس هو أخذ للوراء در وحاول انه يرد الضيوف ويحطهم في بيت الشعر اللي برا بس ما أمداه , لف وصدم واحد من خوياه الشيبان يوم صدمه صاح الشايب (أبك أبك أبك أنت علامك صكيت جبهتي) , ابوي لف ثاني مره جهتي لأنه درى ان مايمديه يسوي شي لأنهم دخلوا المجلس خلاص وبيشوفون المصيبه اللي قدامهم << ياخوي لاتكبر السالفه والله لو إنه شايفك نايم ومعك جوليا روبرتس ههههههه يوم غير اتجاهه ناحيتي لا إرادياً شاتني شوته طالعه من اللاوعي حقه ومن عقله الباطن ومن ترسبات قديمه راسخه في وجدانه من علوم الرجال اللي حافظها صم !! شاتني شوته يالربع ولا شوتة موسى نضاو السنغالي , وش نضاوه بعد إلا ولا شوتة روبرتو كارلوس هذيك اللي صارت فيه الكوره تفرفر في الهوا وهي رايحه للمرمى ! هو شاتني والا ماشاتني ! إلا وانا ضارب في وحده من زوايا المجلس العلويه وارتد لهم ثاني مره << والله لو انك كوره مرتده من قائم مرمى !! يوم ارتديت له انفكت رجله من قوة الشوته قال واحد من خوياه الشيبان وخر وخر وخر خله علي !! , طبعاً هو الشايب اللي صقعه ابوي يوم لف واثر جبهته صارت مورّمه من راس ابوي , ويبي يبرد تسبده فيني << أجل تبيه يطق أبوك !! المهم انا جيته راجع بعد ما بنطت في الجدار ضربت في سقف المجلس وجيتهم وانا ماودي !!! مابيكم وش تبون فيني ياشيبان الفلس ,, إلا ويتبسم هالشايب وتطلع ضروسه السود وشفت ثناياه وانا طاير في الهوا مقبل عليه , صاير لونها اصفر من كثر مايقحن في القهوه ولسان حاله يقول (هو انتا جيت والا الهوا جابك) ويستقبلني على صدره وارتفع فوق شوي ويرجع رجله اليمين للخلف ولا كأنها رجل الكابتن بسام يوم يشوت الكوره في مسلسل الكابتن ماجد ! , يوم رجعت رجله للخلف وتضرب في خويهم الثالث اللي في حاله وهو الوحيد فيهم اللي ما بعد جته اصابه في الحوسه اللي صايره ويضرب عرقوب الشايب أبو سنون بين رجول خويهم الثالث من فوق ,في منطقه حساسه جداً جداً وتهم كل رجل بهذه الدنيا << خلاص يابثر فهمناها , إلا والشايب الثالث يتطوى على السيراميك بس ماحد انتبه له لأن الأنظار متجهه علي ويشوتني شوته يالربع من قو الشوته حقته جلست اشره على ابوي واقول انشهد ان ماعنده رجل زي الناس ههههههههه << انت فاضي تقيم شوت الشيبان والا تصيح من اللي جاك المهم ابشركم اني شطحت هالمره عن الجدار وطلعت مع الدريشه حقت المجلس والحمد لله ان الدريشه ماحط لها أبوي شبك حديد والا كان علوم !! << إلا قول المخرج عاوز كدا ابد انكسر القزاز حق الدريشه الا وانا في الحوش ومن الخوف والرعب اللي شفته ماحسيت بآلامي وقمت وركضت بس للأسف صار فيني طعجه بالشاص وصرت أحذف يمين وماقدرت اركض بخط مستقيم صرت اركض بشكل دائري , أبي الباب حق الشارع وماقدرت , أبي النحشه وماقدرت , لفيت بزاويه مقدارها 360 درجه إلا وانا راجع لنفس المكان اللي انحشت منه !!! رجعت لمجلس الشايب من باب صالة الرجال يوم شافوني اقبلت عليهم قالوا بس أكيد قفلت معه ورجع عشان ينتقم !! هههههههههههههه مايدرون , مايدروووووون وش مرجعني الشايب اللي ضربني خاف مني واندس ورى أبوي وابوي صار في الواجهه وجلس يخبص بكلام فهمت منه انه يذكرني بتاريخه المشرف في تربيتي وذكرني بأن الدين حث على بر الوالدين وانه مره أعطاني 3 ريال فسحه بدل مايعطيني ريالين لأنه ارتاح لي وحس ان ماني ماخذ السنه بسنتين في كل مرحله دراسيه مثل باقي اخواني وانه حتى يوم سويتها وطلعت مثلهم (ما أكلت) معه أبد واستمر يعطيني ريالين فسحه اثاري حتى ابوي خاف مني وقال في نفسه( يسويها مفهي) ,يسويها زي ال(بيس اوف كيك) << دبلجة المثل بالعربي يعني زي براد ابو اربعه !! بالمناسبه الشايب الثالث مازال يتطوى في المجلس وماحد حوله هههههههههههههههه المهم أنا حاولت اني أوخر عن أبوي << مازال حاط أبوه أول واحد في قائمة أفضل 100 رجل في العالم ,,, وماطرى لي من الطواري اللي طرت على هالشيبان شي بس وش اسوي الحظ الأقشر هو اللي رجعني لهم ,, يوم شفت الوضع متأزم عندهم وعندي إلا واسحب ذاك الجلنط اللي من قو صوته قام جارنا من نومه وهو مفزوع واتصل بالهلال الأحمر يحسب انه صار حادث في الشارع اللي قدام بيتنا !! على فكره يوم اتصل جارنا ورجع يبي يرقد حصل الخدامه قدامه تكنس في الصاله وملقيته ظهرها والعايله كلها نايمه ماحد صاحي إلا هو وهي فتعوذ الرجال من ابليس وراح ينام << لاياشيخ ههههههه نرجع لسالفتي أنا يوم مسكت فرامل إلا وريحة كفر رجلي طالعه وطالع منها دخان !! يوم مسكت فرامل ووقفت مكاني ارتاحوا الشيبان (وتنفسوا الصعداء) << حتى نشر هذا المقال مايدري وش معناها ههههههههه المهم ويطالعون فيني بدهشه وانا مسنتر قدامهم قالوا لاحول ولا قوة إلا بالله , لله ما أخذ ولله ما أعطى << ليه شايفهم في مجلس عزا , قام ابوي وصرف السالفه كلها وقال مفهي ياولدي تكفى ياذيبان روح جب لنا قهوه ,, (الهمام) يامال الغنيمه ولا كأنه صار شي أبد حسيت ان ابوي يوم قالها تأثر ورجع له قلبه الحنون اللي أنا خابره وحس أنه تصرف معي تصرف لا إنساني !! حتى الشايب ابو سنون صفر اللي شاتني , حنّ علي يوم شاف موية البراءه تنبع من براطمي !! وقال والله مايروح انا اللي بسوي القهوه لكم في بيت الشعر , لكم فتره ماذقتوا القهوه من يدي وبسويها لكم وراح ابوي والشايب اللي معه لبيت الشعر !!
أما الشايب الثالث فمازال في المجلس يرفس مكانه ههههههههههههههههههه
انتهت القصة وأتمنى تعجبكم وهي مجرد أرانب طرت علي (في مثل هذا اليوم) وفي الخاتمه يجب أن لاتمر علينا هذه القصه مرور الكرام فيجب على الإبن انه مايرقد في المجلس عشان مايحرج أبوه فيه اختراع اسمه مقلّط << ياخي فيه اختراع افضل اسمه غرفة نوم ههههههه والأب يجب أن يراعي أي تصرفات غير منطقيه من أبناءه فمهما كان , فإنه لكل إبن سلوك قد يراه الكبار أنه غير منطقي لكن هذا الإبن يعتبره شي عادي أو يوم سواه ما أخذ في باله ردة فعل الغير من هذا الشي اللي سواه ويمكن لو الأب تعامل مع أي تصرف يصير من أبناءه بعقلانيه وبهدوء قد يحميه من تصرفات أخرى أكبر وأدهى
دمتم بود
| |
|
شاعر الجروح عضو مهم
عدد الرسائل : 166 العمر : 36 تاريخ التسجيل : 08/03/2008
| موضوع: رد: مفهي ومجلس أبوه ( حدث في مثل هذا اليوم ) 20/3/2008, 4:56 pm | |
| ههههههههههههههههههههههههههههههههههههههههههه قويه | |
|
غريم الليل مراقب عام
عدد الرسائل : 369 العمر : 38 الأوسمه : تاريخ التسجيل : 02/03/2008
| موضوع: رد: مفهي ومجلس أبوه ( حدث في مثل هذا اليوم ) 21/3/2008, 2:18 am | |
| دوم منووووووووووووووووووور | |
|